Real Madrid eliminoi PSG-në dhe kaloi në çerekfinalet e Champions League, por mikpritja e treguar nga parisienët në ndeshjen e kthimit nuk ishte ajo që pritej. UEFA ka nisur një hetim ndaj PSG pas udhëtimit të Real Madrid në Paris të martën në Champions League. Drejtuesit e klubit akuzohen për shkelje të rregullave dhe mosplotësimin e kushteve të sigurisë, pasi kishin lejuar që në stadium të futen tifozë me lazera dhe tymuese.
Gazeta franceze L’Equipe ka zbuluar të shtunën se skuadra franceze është munduar të dëmtojë sa më shumë të jetë e mundur ekipin spanjoll. Raporti sugjeron se klubi francez i ka kërkuar autoriteteve të mos mundësojnë forca policore për të eskortuar Real Madrid nga hoteli ku po qëndronte deri në stadium përpara ndeshjes.
Kërkesa është bërë nga PSG drejt policisë vetëm disa orë përpara ndeshjes por kërkesa është refuzuar. Qëllimi ka qenë i qartë. Por policia ka vepruar me moral të lartë duke mundësuar sigurinë e plotë për autobusin e Real Madrid.
