Humbja e tretë rradhazi në zgjedhjet parlamentare, pritet të shkaktojë ”furtunë” brenda strukturave të Partisë Demokratike.
Pas anëtarit të Kryesisë, Fatbardh Kadilli, edhe ish-Presidenti Bujar Nishani ka kërkuar dorëheqjen e kryetarit të kësaj force politike, Lulzim Basha pas humbjes së demokratëve.
Sipas tij, Basha duhet të merrte përgjegjësi për dështimin, të cilin Nishani e konsideron si personal të kreut të PD-së.
Reagimi i Bujar Nishanit
Të dashur miq, rezultati i zgjedhjeve ishte zhgënjim dhe dëshpërim i madh për votuesit dhe mbështetësit e opozitës si dhe një mundësi e pashfrytëzuar për ndryshimin e shumëpritur.
Qeverisja e korruptuar e Edi Ramës do të vijojë të mbajë pushtetin përsëri, pas 8 viteve të skandaleve e dështimeve !
Sot është momenti që Partia Demokratike të çlirohet nga shembulli i paaftësisë dhe modelit që po e asgjeson atë pak nga pak.
Sot është momenti që Partia Demokratike të lihet e lirë për tu ringritur në madhështinë që i takon si Parti e Lirisë dhe Rinisë.
Sot përgjegjësi kryesor i 4 humbjeve politike rradhazi vendosi ta mbajë peng Shtëpinë e Lirisë në interes të pushtetit të tij personal !
- Basha sot duhej të merrte përgjegjësinë e dështimit të tij personal prej 8 vitesh!
Sot Edi Rama mban peng Shqipërinë dhe Lulzim Basha tenton të mbajë peng Partinë Demokratike.
Partia Demokratike nuk është pronë personale e një njeriu.
Ajo është Shtëpia e Lirisë e qindra mijëra shqiptarëve.
Askush nuk do të mundet ta marrë atë peng për asnjë arsye, në asnjë formë e me asnjë çmim!
