Nga sot nisin aplikimet për panelet diellore, për ngrohjen e ujit me financim 70 % nga buxheti i shtetit. Rama shprehet se qeveria shqiptare do të vazhdojë të mbështesë dhe të mbrojë konsumatorin në këtë situatë krize energjie globale.
“Qeveria Shqiptare do të vazhdojë të mbrojë konsumatorët familjarë dhe biznesin e vogël në këtë situatë krize energjitike të shkaktuar nga agresioni rus mbi Ukrainën, kundër bashkësisë euroatlantike.
Thirrja e parë për 70% subvencionim nga Agjencia për Efiçencën e Energjisë për panelet me ngrohje diellore për familjarët”.
Nga ky subvencionim përfitojnë vetëm ata konsumatorë të cilët harxhojnë mbi 250 kW çdo muaj energji elektrike, si dhe ata që trajtohen me ndihmë ekonomike. Ky kriter vlen të paktën për 6 muaj e fundit që nga aplikimi. Në kriteret e përcaktuara nga Ministria e Energjetikës dhe nga Agjencia e Eficencës së Energjisë, thuhet se ndër të tjera abonenti i cili aplikon për panel diellor nuk duhet të jetë debitor në OSHEE.
Pranohen edhe ata abonentë familjarë të cilët kanë lidhur një marrëveshje me OSHEE për shlyerjen me këste të detyrimeve të prapambetura. Po ashtu nuk përfitojnë nga ky aplikim konsumatorët familjarë, banesa e të cilit është e pa legalizuar apo në proces legalizimi.
Klientët familjarë duhet të plotësojnë këto kritere:
- Të paraqesin një kontratë ekzistuese me OSHEE/Furnizuesi i Shërbimit Universal ku të jenë të klasifikuar si abonent familjar dhe një historik të konsumit të energjisë për të paktën 6 muaj, që nuk duhet të jetë më pak se 250 kWh për cdo muaj. Ky kriter nuk eshte i zbatueshëm per klientët qe trajtohen me ndihmë ekonomike nga ministria përgjegjëse për punët sociale;
- Të vërtetojnë se nuk janë debitorë kundrejt OSHEE/FSHU;
- Të zotërojnë çertifikatë pronësie për banesën ose njësinë e banimit (rastet që janë në proces legalizimi nuk do të konsiderohen).
Lista e dokumenteve që duhet të paraqesin konsumatorët familjarë për aplikim në platformën online:
- Letërnjoftimi (pasaportë/kartë identiteti);
- Certifikata Familjare;
- Certifikatë Pronësie;
- Faturat e energjisë elektrike për 6 muajt e fundit;
- Të paraqesin vërtetim debie nga e-albania që të vërtetojë se nuk janë debitorë kundrejt OSHEE/FSHU për pagesën e energjisë elektrike, ose janë në një marrëveshje për shlyerjen me këste të detyrimeve të prapambetura;
- Foto në të cilat tregohet qartë pamja e jashtme e objektit ku do të instalohen panelet diellore për ngrohjen e ujit.
- Sipas rastit dokument që vërteton se janë përfitues të ndihmës ekonomike;
- Formulari e vetëdeklarimit sipas Shtojcës nr. 2.
