Ministri i Brendshëm Fatmir Xhafaj ka pritur në një takim punë Presidentin e Autoritetit Kombëtar Kundër Korrupsionit të Italisë, Raffaele Cantone. Zhvillimet e fundit në prokuroritë e rretheve kanë intensifikuar takimet mes drejtuesve të komanduar të policisë, prokurorëve dhe krerëve të tjerë të mekanizmave ligjzbatuese. Kjo tregon se reforma në drejtësi është futur në fazën e saj të implementimit dhe frika tashmë sa vjen dhe shtohet.
Gjatë takimit ministri Xhafaj ka njohur Cantone me dokumentin politik të Ministrisë së Brendshme, për reformat e fundit që po ndërmerren në Policinë e Shtetit , procesin e vettingut në polici, ndërsa ka veçuar ndihmën e misionit evropian PAMECA.
Ndërkohë gjatë takimi si temë diskutimi ka qenë edhe aksioni i policisë “Forca e Ligjit”, i cili pritet që gjatë muajit shkurt të bëjë të mundur kapjen dhe arrestimin e grupeve të identifikuara kriminale. “Forca e Ligjit” dhe veprimtaria e policisë, mësohet se ka identifikuar disa grupe të rrezikshme kriminale, të cilat veprojnë në Shqipëri, por truri i tyre komandon nga jashtë vendit.
Sakaq, mësohet se këto grupe janë në skanim nga policia, ndërsa pas arrestimin të tyre do të kalojnë në sitë të gjithë asetet e tyre pasurore të konfiskohen, pasi burimi i tyre është tërësisht kriminal.
Në këtë takim është theksuar edhe rëndësi e procesit të vettingut në polici, ndërsa Presidentin e Autoritetit Kombëtar Kundër Korrupsionit të Italisë, Raffaele Cantone, vlerësoi nismat ligjore të Shqipërisë, duke shtuar se Italia do ta japë mbështetje që të krijohet nisma për ruajtjen e integritetit profesional të Policisë së Shtetit.
Njoftimi i Ministrisë së Brendshme
Ministri i Brendshëm Fatmir Xhafaj priti Presidentin e Autoritetit Kombëtar Kundër Korrupsionit në Itali, Raffaele Cantone. Zoti Xhafaj e njohu bashkëbiseduesin me dokumentin politik të Ministrisë së Brendshme, reformat e fundit që po ndërmerren në Policinë e Shtetit në kuadër të Vettingut në Polici dhe Policimit në Komunitet, ku veçoi asistencën e misionit europian PAMECA. 
Ai e njohu me ecurinë dhe rezultatet e operacionit “Forca e Ligjit”. Ministri i Brendshëm u ndal gjithashtu tek prezantimi i nismës për Vetting-un në Polici, përmes së cilës synohet të shëndoshet organizata dhe promovohen punonjësit me integritet.
Kreu i Autoritetit Antikorrupsion në Itali theksoi rëndësinë e bashkërendimit të reformës në gjyqësor dhe reformimit të Policisë së Shtetit. Ai vlerësoi cilësinë e legjislacionit që po implementohet në Shqipëri dhe u shpreh i gatshëm për të rritur nivelin e bashkëpunimit me Ministrinë e Brendshme, sidomos për masat pas vënies në zbatim të procesit të Vetting-ut, për sigurimin e mekanizmave parandalues dhe garantimit të integritetit në të ardhmen të punonjësve të Policisë.
