Bashkia e Tiranës me në krye Erion Veliaj, ka marrë zotimin për të “pastruar futbollin”. Prokuroria e Tiranës ka nisur sot një hetim për Dukën, me akuzën e “shpërdorimit të detyrës”. Vetëm pak orë më pas, FSHF-ja ka organizuar një konferencë shtypi, ku denoncon kryebashkiakun e Tiranës, Erion Veliaj, për presion të hapur para zgjedhjeve për Shoqatën Rajonale të Tiranës. FSHF-ja vë në dispozicion edhe një material audio, ku dëgjohet zëri i kryebashkiakut Veliaj, që kërkon mbështetjen në bllok të kandidatit Eduard Prodani.
Po ashtu, Veliaj i drejtohet edhe Sulejman Memës, një figurë e njohur e futbollit shqiptar dhe kandidat për kreun e kësaj shoqate, duke i kërkuar “llogari”, se si ka mundësi që Duka i ka marrë burrërinë. FSHF-ja ka denoncuar presionin që është bërë në këtë mbledhje për të votuar kandidatin Eduard Prodani, duke përdorur edhe fjalor banal nga ana e kryetarit të Bashkisë.
E gjithë mbledhja ishte regjistruar, dhe FSHF-ja ka publikuar audion e saj, si provë të presioneve që i ishin bërë anëtarëve të Shoqatës Rajonale të Tiranës. FSHF-ja ka bërë të ditur se për këtë situatë, do u drejtohej organeve përkatëse ligjore, ndërsa ka konfirmuar se zgjedhjet në Tiranë do të zhvilloheshin normalisht.
Kjo audio i është vënë në dispozicion Prokurorisë, kësaj herë nga FSHF-ja, ku Duka pretendon se ndaj tij po ushtrohet presion politik. Në një kohë kur debati mes kryetarit të Bashkisë së Tiranës, Erion Veliaj dhe kreut të FSHF-së, Armand Duka, janë në kulmin e tyre, të tjera zhvillime vijnë në këtë drejtim. Përfaqësues të Drejtorisë së Përgjithshme të Tatimeve, kanë mbërritur në ambientet e kompanisë së prodhimit të vezëve “AIBA” në Shkozet, në pronësi të kreut të FSHF-së, Armand Duka. Sipas burimeve të Dosja.al, mësohet se Tatimet kanë shkuar tek bizneset e Dukës, ku raportohet se ka hequr tendën e një lokali në pronësi të Sekretarit të Federatës te zona e “Vasil Shantos” në Tiranë, ndërsa kanë ushtruar kontrolle edhe tek magazinat e Lutfi Nurit, që është Zëvendës Presidenti i Federatës Shqiptare të Futbollit.
