Nis gjyqi për ‘krime lufte’/ Prokurorja: Hetimi të nisë verën e 2021

Me 45 minuta vonesë ka filluar konferenca mbi ecurinë e çështjes gjyqësore ndaj Hashim Thaçit, Kadri Veselit, Rexhep Selimit, Jakup Krasniqit.

Thaçi, Veseli, Krasniqi dhe Selimi nuk ndodhen në sallën e gjyqit dhe përfaqësohen nga avokatët e tyre përmes lidhjeve live.

Ish-drejtuesit e UÇK-së dolën për herë të parë në gjyq më 9 Nëntor, dhe u vetëdeklaruan të pafajshëm ndaj akuzave të Gjykatës Speciale. Ata akuzohen për krime kundër njerëzimit, vrasje të paligjshme dhe torturime gjatë luftës së fundit në Kosovë.

Prokurorja e Speciales, në seancën për ecurinë e çështjes për ish-krerët e UÇK-së, ka thënë se procesi i hetimeve është në vazhdim e sipër.

“Synojmë të ndjekim urdhërim e juaj për masa mbrojtëse. Mbrojtja ka informacion të bollshëm për të filluar hetimet menjëherë, ua kemi bërë të ditur afatin për nxjerrjen e materialeve. Mbrojtja është e njoftuar me çështjen dhe kjo nuk është befasi për ta”, u shpreh Prokurorja e ZPS-së.

Ajo shtoi se për mendimin e ZPS-së, nuk ka asnjë pengesë që gjykimi të filloj në verën e vitit 2021. Prokurorja shtoi se në aktakuzë duhet të bëhen edhe disa redaktime.