Ministri i Jashtëm grek, Nikos Kotzias ka dhënë një intervistë për “Real News”, ku dha një mesazh për Ankaranë, Turqinë dhe Shkupin.
“Nuk do të pranojmë nga askush të ndryshojë kufijtë, kush luan me zjarrin, digjet!”, ka qenë ky qëndrimi i Kotzias, i cili theksoi se disa ëndërrojnë madhështi të rreme, të cilën nuk mund ta lejojë BE-ja dhe Greqia.
Ministri Kotzias u shpreh se rruga drejt BE-së kalon nëpërmjet reformës gjyqësore, luftës kundër krimit të organizuar dhe trafikut të drogës, si dhe mbrojtjes së minoritetit kombëtar grek.
Teksa u pyet për deklaratat e Ramës se Greqia është një nga vendet që merr pjesë në destabilitetin e Shqipërisë, Kotzias tha se nuk ka dëgjuar nga udhëheqja shqiptare diçka të tillë dhe se askush në Tiranë nuk mund ta thotë këtë.
“Shqipëria u anëtarësua në NATO dhe rruga e saj europiane u hap me mbështetjen e Greqisë, e madje pa këmbim dhe ky ishte një gabim. Tejkalimi i çdo paqëndrueshmërie brenda Shqipërisë kërkon konsolidimin e mëtejshëm të demokracisë dhe kulturën e kompromisit”, tha Kotzias.
Për sa i përket Shkupit, Kotzias shpreh shqetësimin e mungesës së kësaj kulture të mirëkuptimit dhe kompromiseve brenda vendit, duke theksuar se dëshira e Athinës është që të funksionojë demokracia dhe shteti ligjor, të cilat shihen nga Greqia si një faktor stabiliteti politik në rajon, shkruan TCH.
Ndërsa duke iu drejtuar Turqisë, ai thekson se “Greqia nuk është një vend i shkatërruar dhe as një shënjestër e lehtë”, ndaj dhe i fton fqinjët lindorë “të mos vënë më në pikëpyetje të drejtën dhe traktatet ndërkombëtare, të pranojnë realitetin dhe t’i rikthehen një dialogu produktiv”.
