Nikolae Çausheshku, si u poshtërua dhe ekzekutua diktatori komunist rumun

Rumania përjetoi një nga regjimet më të rrepta komuniste në të gjithë Evropën Lindore. Më shumë se 2 milionë persona u vranë, burgosën, apo internuan gjatë viteve 1945-1989. Nikolae bëri vetëm 4 vite shkollë.

Në adoleshencë, punoi si këpucar, deri sa u arrestua dhe u dënua për përhapje të propagandës komuniste. Kur u ngjit në pushtet në vitin 1965, e përdori shërbimin sekret, për të përgjuar dhe terrorizuar rumunët. Përgjimit nuk i shpëtuan as fëmijët e tij.

Gjatë sundimit të tij, Çausheshku jetoi në një luks të shfrenuar. Në kohën e tij Rumania u zhyt në borxhe të mëdha, ndërsa rumunët e thjeshtë mezi mbanin frymën gjallë. Durimi i tyre u sos në dhjetorin e vitit 1989, kur në gjithë vendin shpërthyen protestat.

Diktatori organizoi një tubim të madh në Bukuresht, për të treguar se kishte ende popullin me vete. Pikërisht më 22 dhjetor, mijëra rumunë e poshtëruan, duke e tallur dhe ndërprerë fjalën.

Nga ai moment situata doli jashtë kontrollit. Çaushesku u arratis me të shoqen, por u kap dhe u ekzekutua më 25 dhjetor pas një gjyqi të shkurtër.

TIRANA TODAY