Kreu i Këshillit të Lartë të Prokurorisë, Gent Ibrahimi, në një intervistë për “News24” tha se ngritja e SPAK është pranë finalizimit, dhe se në garë janë 15 kandidatë, ndërsa do diskutohet nëse SPAK mund të ngrihet me një numër minimal anëtarësh.
Ibrahimi thekson se procesi është drejt përfundimit, dhe se nga 15 kandidatë në garë, 5 prej tyre e kanë kaluar procesin e Vettingut.
“Ne kemi diskutuar dhe më herët që numri mund të jetë dhe më i pakët. Këtë sezon shpresojmë ta finalizojmë me SPAK. Ne do diskutojmë se cili do jetë numri minimal që mund të ngremë SPAK”, u shpreh ai.
“Ne sot nisim sezonin e ri të punës të Këshillit të Lartë të Prokurorisë. Padyshim që në fillim të këtij sezoni shpresojmë të finalizojmë procesin afatgjatë të ndërtimit të Prokurorisë së Posaçme.
Ne në këtë moment, nga ai grup prej 15 prokurorësh që kemi përzgjedhur si kandidatë për në SPAK, presim verifikimin e kushtit të fundit që është kalimi prej tyre i procesit të Vettingut. 5 prej tyre e kanë kaluar plotësisht dhe mund të emërohen çdo çast nga ana jonë, sidoqoftë ne presim një numër të arsyeshëm. Se çfarë është ky numër i arsyeshëm, do të jetë vendim i Këshillit”, deklaroi Ibrahimi.
