Instituti i Sigurisë Ushqimore dhe Veterinarisë, në një deklaratë për mediat tha se konsumatorët e vezëve dhe mishit të shpendëve nuk duhet të kenë frikë, pasi nuk shkakton problematikë në shëndetin e njerëzve.
Sipas përfaqësuesve të këtij institucioni, një virus i tillë është sinjalizuar që në 9 mars nga subjektet dhe rasti i parë i gripit të shpendëve me datë 19 mars. Në deklaratën e tyre u theksua se nuk ka asnjë rast në botë ku një qytetar është sëmurë nga konsumi por vetëm nga kontakti i drejtpërdrejtë me shpendët e sëmurë.
“Në këto data rezultat e ISUV në bazë të mostrave kanë rezultuar pozitive për laringo trakeit, në datën 19 mars janë marrë mostra të reja nga një subjekt, kanë qenë 18 mostra dhe na është konfirmuar prezenca e gripit të shpendëve. U morën masat siç i parashikon kontrollet, deklaratë pranë Ministrisë së Bujqësisë dhe një urdhër për masat e parandalimit, këto masa shoqërohen me protokollet, nga ISV, AK i mbrojtjes së bimëve dhe të Autoritetit të Ushqimit. Kemi karantinuar zonën që ka rezultuar pozitive, në rreze prej 3 km është vatra e rrezikut dhe 10 km është monitorimi.
Kemi marrë masa të mëtejshme, Ministria e Bujqësisë dhe ministritë e linjës dhe njësitë e qeverisë vendore për t’i informuar për planin e mëtejshëm të masave. Prodhimi vezë është i izoluar, AKU i ka marrë masat, por duam të sigurojmë publikun që kjo sëmundje nuk shkakton problematikë në shëndetin e njerëzve”, thuhet në deklaratë.
