Reagon presidenti Meta pas ngjarjes tragjike që ndodhi në Kavajë, ku pas përplasjeve me armë të dy bandave, ka mbetur aksidentalisht i vdekur 1 person i moshës 50-vjeçare.
Meta ka shprehur shqetësimin e tij në lidhje me këtë ngjarje, si dhe dekalron se ka folur në telefon me kryetarin e Bashkisë së Kavajës, që t’i përcjellë ngushëllimet e tij familjes së viktimës.
Më tej, presidenti Meta thekson domosdoshmërinë e rritjes së gatishmërisë së Policisë së Shtetit dhe agjencive ligjzbatuese, teksa kërkon që autorët e kësaj ngjarjeje të vihen para drejtësisë.
Reagimi i plotë:
REAGIM I PRESIDENTIT TË REPUBLIKËS SH.T.Z ILIR META 4 korrik 2019
Presidenti i Republikës Sh.T.Z Ilir Meta shpreh shqetësimin e thellë për ngjarjen tepër të rëndë dhe tragjike, të ndodhur sot në qytetin e Kavajës, ku një qytetar i pafajshëm humbi jetën dhe disa qytetarë të tjerë u plagosën. Presidenti Meta pati një bisedë telefonike me Kryetarin e Bashkisë së Kavajës, z.Isa Sakja dhe i kërkoi t’i përcjellë ngushëllimet dhe solidaritetin e Tij më të sinqertë të afërmve dhe familjarëve të qytetarit që humbi jetën, si dhe u uron shërim të shpejtë të gjithë të plagosurve. Presidenti Meta kërkon nisjen e menjëhershme të hetimeve për këtë ngjarje të rëndë, zbardhjen e shpejtë dhe të plotë të saj, si dhe vënien para përgjegjësisë të autorëve. Presidenti Meta thekson domosdoshmërinë e rritjes së gatishmërisë së Policisë së Shtetit dhe agjencive ligjzbatuese, për të marrë të gjitha masat e duhura për garantimin e sigurisë publike në vend dhe parandaluar përsëritjen e ngjarjeve të tilla kaq të rënda e tragjike.
