UPDATE – Lidhur me lajmet që qarkulluan sot në media, referuar identifikimit të personave që dyshohen si autorë të supergrabitjes, Policia e Shtetit bën me dije se nuk kanë asnjë vërtetësi. Uniformat blu dhe Prokuroria, mbeten të angazhuara për zbardhjen sa më të shpejtë të rrethanave të grabitjes, zbulimit të autorëve dhe përballjen e tyre me drejtësinë. Po kështu policia kërkon ndihmën e qytetarëve, të cilët mund të ndihmojnë në hetim.
Çfarë u raportua më herët në media:
Zbulohet personi i tretë, i dyshuar si një nga autorët e grabitjes spektakolare të 9 prillit në Rinas, ku u morën disa milionë euro.
Ai është Aleks Pepa, i cili po ashtu ka kryer grabitjen e parë në Rinas, më 30 qershor të 2016-ës, ku një automjet tip Benz mori një shumë rreth 1 milion euro.
Kush është Aleks Pepa
Aleks Pepa ka punuar si emigrant në Greqi, por në vitin 2015 është kthyer në Shqipëri. Pepa, ka bashkëpunuar dhe me dy persona të tjerë, për grabitjen në 2016 në Rinas.
Fotoja e Aleks Pepës, është publikuar dhe në faqen e interpolit, ku 45-vjeçari thuhet se është nga qyteti i Elbasanit. Ndërkohë informacionet flasin se Aleks Pepa pas kryerjes së grabitjes është larguar nga Shqipëria në drejtim të Rumanisë dhe më tej nuk dihet destinacioni i tij.
Për të hedhur dritë mbi intenerarin e tij, Prokuroria e Krimeve të Rënda mësohet se pak kohë më parë i është drejtuar me një letër-porosi, autoriteteve Rumune, duke i kërkuar këtyre të fundit për të verifikuar vendndodhjen e Aleks Pepës, ose drejtimin e udhëtimit të tij nga Rumania e tutje. Identifikimi i Pepës është bazuar në analizën e ADN-së së një fije floku, të gjetur në paruken e hedhur pas grabitjes.
Nga ana tjetër, burimet thonë se ende nuk ka asnjë adresë mbi vendndodhjen e Pepës dhe dy bashkëpunëtorëve të tjerë në këtë supergrabitje. Por pavarësisht kësaj, gjykata që prej vitin 2016 ka caktuar masën e sigurisë “arrest me burg” në mungesë, pasi provohet implikimi i 37-vjeçarit Aleks Pepa, në grabitje dhe dy personave të tjerë.
Një nga këta persona është Admir Murataj, i konsideruar si truri i grabitjeve në fjalë, i cili mbeti i vrarë gjatë grabitjes në Rinas, më 9 prill.
Emri i bashkëpunëtorit të dytë doli më herët në media, ku dyshohet se ai është Klement Çala nga Elbasani. 31-vjeçari është i njohur nga policia, pasi është shpallur në kërkim në vitin 2017, atëherë kur u goditën blindat me para. Në atë kohë, Çala dhe Murataj, arritën t’i shpëtonin policisë, dhe duket se e kanë vijuar planin e tyre të grabitjeve.
Identifikohet njëri nga grabitësit e Rinasit, e shkuara kriminale e 31-vjeçarit
