Ashtu siç ishte lajmëruar më herët, sot ka pasur një takim midis presidentit Meta dhe ish-presidentit Bujar Nishani. Pas përfundimit të takimit, Nishani ka dhënë edhe një prononcim për mediat.
Ai është shprehur se është informuar nga presidenti me fakte që s’janë të bëra publike për mënyrën sesi po ‘kapen’ institucionet. Madje, ai ka pohuar se është i tronditur nga infektimi që i është bërë sistemit i drejtësisë.
“U njoha me çështje të pabëra ende publike nga na e presidentit që tregojnë për një tendencë për të minuar institucionin e presidentit dhe besueshmerinë e proceseve shtetndërtuese në vend ndaj e mbështes plotësisht presidentin në qëndrimin e tij kushtetues në mbrojtje të integritetit të atij që është si një proces që shqiptaret po e mbajnë gjallë besimin, reformën në sistemin e drejtësisë, por mbi të gjithë respektin ndaj shtetit të së drejtës”- tha Nishani.
Pyetjeve të gazetarëve se për çfarë faktesh bëhet fjalë, ai i është përgjigjur duke thënë se i takon presidentit ti bëjë publike.
“I takon presidentit ti bëjë publike gjërat, por besoj që cdo veprim dhe përfshirje janë në kompleksitetin e tyre të lidhur me minimin e procesit që ka ndjekur presidenti dhe duhet të kemi të nevojshëm që është ndërtimi i shtetit të së drejtës”.
