Të dielën Skënderbeu do të luaj ndeshjen e fundit për këtë sezon, finalen e Kupës përballë Laçit. Por duket se kjo do të jetë edhe ndeshja e fundit për lojtarin më të mirë në mesfushën e “Ujqërve”, Sabjen Lilaj. Është folur shumë që Lilaj kishte arritur një marrëveshje me ekipin e Palermos, por ky transferim është i arritshëm me një kusht. Palermo duhet të sigurojë kthimin në Serie A që të bindë 29-vjeçarin të transferohet atje.
Palermo është ende në lojë për ta arritur këtë objektiv, pasi do të luajë fazën “play-off”. Palermo, Frozinone, Venecia, Çitadela, Bari dhe Peruxhia janë skuadrat që do të ndeshen në këtë fazë për të siguruar një vend për Seria A.
Ndërmjetës për këtë transferim të bujshëm të korçarit te klubi sicilian është bërë ish-mesfushori i Kombëtares, Edvin Murati. Lilajt i mbaron kontrata me Skënderbeun, kështu që Palermo mund ta rrëmbejë me parametër zero mesfushorin. Nga ajo që është thënë në fillim, Lilaj pritet të përfitojë 250 mijë euro në sezon te Palermo, nëse gjithçka finalizohet me sukses.
