Kur në pjesën jugore të vendit banorët përballen me vështirësitë e përmbytjeve, në veri të vendit janë reshjet e borës që kanë krijuar vështirësi për banorët.
Përgjatë 24 orëve, qyteti verilindor i Kukësit është përfshirë nga reshjet e borës dhe për pasojë situata është vështirësuar ndjeshëm. Probleme të konsiderueshme po hasin zonat e thella malore, ku trashësia e dëborës e bënë të pamundur lëvizjen e mjeteve .
Trashësia e dëborës arrin deri në 40 centimetra, ndërsa zona më problematike është ajo e fshatit Grykë Çajë. Probleme të shumta ka edhe në fshatin Lojme, pasi reshjet e shiut kanë krijuar rrëshqitje të tokës. Situata është e rënduar edhe për nxënësit e shkollave pasi nuk mund të ndjekin rregullisht mësimin për shkak të reshjeve të dëborës së rënë përgjatë 24 orëve të fundit.
Energjia elektrike është po ashtu një nga problematikat e këtij qarku, ndërsa grupi i punës së OSHEE është në terren dhe po punon për rikthimin e energjisë në fshatrat ku mungon.
