Kryeministri Edi Rama ka bërë edhe një herë me dije se aplikacioni për marrjen e ‘leje-daljes’ është plotësisht funksional.
Përmes një postimi në Facebook, Rama paralajmëron se duke filluar që nga dita e nesërme nuk do të ketë më këshillime për shkelësit, duke lënë të nënkuptuar se do të ndëshkohen.
Kreu i qeverisë ka ndarë me qytetarët edhe një video nga aksioni i sotëm i policisë, të cilët kanë dalë për të verifikuar nëse kalimtarët kanë apo jo lejen e daljes.
“Aplikacioni për leje-daljen e vetëm një personi nga familja për pazar është plotësisht funksional. Nga nesër nuk ka më këshillime për shkelësit”, shkruan kryeministri krahas videos.
Kjo masë u njoftua nga kryeministri Rama pak ditë më parë, në kuadër të masave të marra për frenimin e përhapjes së koronavirusit.
Kujtojmë se ka dy mënyra për ta përfituar lejen e daljes:
- Duke iu drejtuar aplikacionit e-albania për të aplikuar
- Ose duke dërguar mesazh në numrin 55155, numrin personal të kartës së identitetit dhe fashën orare kur e doni lejen.
