Ministrja e Infrastrukturës, Belinda Balluku, konfirmoi se është marrë konfirmimi nga NATO për Aeroportin “Flatrat e Veriut”. Ajo u shpreh se aeroporti është pjesë e certifikuar e logjistikës së NATO-s, dhe se plotëson të gjitha kërkesat e sigurisë teknike. Ministrja e Infrastrukturës u shpreh se fluturimet me Wizz Air nga aeroporti i Kukësit, do të nisin në maj. “Sot është një tjetër ditë e veçantë për aviacionin, dhe ne ndihemi krenarë për arritjet në këtë fushë gjatë këtyre viteve. Zhvillim shumë i rëndësishëm për aviacionin e Shqipërisë. Ndodhemi këtu me një nga kompanitë më të mëdha low cost të Europës, e cila prek destinacione tashmë edhe jashtë kontinentit, nga i cili ka nisur për të lançuar programin e ri të fluturimeve i cili nis nga maji në aeroportin e Kukësit.
Duke nisur nga 15 korriku i kaluar, kanë filluar fluturimet komerciale, që kanë arritur në 85 gjatë periudhës së verës dhe kryesisht janë kryer nga Air Albania dhe disa kompani të tjera, të cilat do i lënë hapësirë tashmë një operatori të rëndësishëm siç është Wizz Air. Ky është një aeroport rajonal. Ka qenë një rastësi e lumtur dje, që kemi marrë konfirmim nga NATO për këtë aeroport. Aeroporti i Kukësit është pjesë e certifikuar e logjistikës së NATO-s dhe kjo tregon që në këtë aeroport plotësohen të gjitha kushtet e sigurisë të vendosur nga BE dhe NATO”, deklaroi Balluku.
Nga muaji maj i vitit 2022, kompania low cost, Wizz Air, nis fluturimet nga aeroporti i Kukësit në katër destinacione të reja që janë: Vjenë, Mynih, Baden dhe Basel. Kryemininistri Edi Rama publikoi pamjet nga aeroporti i Kukësit, ku pas testimeve që sipas tij kanë rezultuar të suksesshme, “kompania Wizz Air ul avionët e saj në aeroportin ndërkombëtar “Flatrat e Veriut”.
