Duke filluar nga java e ardhshme do të kemi një ndryshim në autorizimin e mjeteve për punonjësit që lejohen të punojnë.
Lajmin e ka bërë të ditur kryeministri Rama, gjatë një komunikimi live në Facebook me qytetarët. Kreu i qeverisë tha se javën e ardhshme ky aplikim do të bëhet në faqen e e-albania dhe jo në Polici.
Sipas tij, kjo bëhet për të hequr fazën e aplikimeve në Polici që kishte dhe në masë refuzimesh apo mospërgjigjesh.
Rama sqaron se këta punonjës shoferë mund të marrin dhe një pasagjer koleg mbrapa të ulur diagonal me të. Kryeministri thekson edhe një herë se “kush merr lejen duhet ta lexojë mirë pasojën penale që vjen nga shkelja e mundshme”.
“Ndërsa javën e ardhshme, në platformën e-Albania do të mund të merret njësoj si për këmbësorët, një autorizim javor për të gjithë ata që janë në punët e lejuara dhe automjeti do të mund të lëvize për vajtje/ardhje në punë me vetëm një njeri tjetër brenda ne sediljen e pasme, i cili mund të jetë vetëm një koleg në të njëjtin vend pune.
Kush merr lejen duhet ta lexojë mirë pasojën penale që vjen nga shkelja e mundshme. Po ashtu, javën e ardhshme do të autorizojmë edhe lëvizjen me automjet për arsye shëndetësore, të mbështetur nga një dokument mjekësor që drejtuesi i automjetit duhet ta mbajë me vete. Edhe për këtë, lejemarrësi duhet ta lexojë mirë pasojën penale që vjen nga shkelja e mundshme”, tha Rama.
