Një situatë e tensionuar është krijuar pak çaste më parë nga naftëtarët e Ballshit, të cilët janë përplasur me forcat e policisë. Ata kërkojnë pagat e prapambetura, ndërsa duan të marrin librezat dhe dokumentat.
Nën thirrjet se “Rafineria është e naftëtarëve”, ata kërkojnë të hyjnë në uzinë dhe të marrin librezat e punës, në mënyrë që të arrijnë të marrin përkrahjen sociale.
Pavarësisht reshjeve të shiut, një pjesë e tyre ende protestojnë, e një pjesë tjetër janë në ditën e 16 të grevës së urisë. Gjendja shëndetësore e tyre paraqitet e rënduar.
Në mbështetje të protestuesve kanë dalë dhe sindikata e fermerëve, të cilët duan të hyjnë me forcë në ambientet e brendshme të uzinës.
Kreu i sindikatës, Sokol Dautaj shprehet se ende nuk kanë marrë asnjë zgjidhje, dhe se greva e tyre do të vijojë. ‘Vijon greva dhe askush nuk pyet. Asnjë reagim nga shteti’.
