Kryeministri Edi Rama ka marrë vendimin se nga e marta, perimetri i ‘blinduar’ do të njësohet me kufirin e Republikës së Shqipërisë. Për rrjedhojë, i gjithë vendi do të jetë në “shtet-rrethim”. Bilanci i COVID-19 në Shqipëri ka shkuar në 42 të prekur.
Javën që vjen, e gjithë Shqipëria do i nënshtrohet vetë-karantinimit si Tirana e Durrësi në këto 3 ditë.
Sakaq, kryeministri Rama ka bërë me dije se mbi 1000 mijë mjek dhe infermierë i janë përgjigjur pozitivisht thirrjes së Ministres së Shëndetësisë, Ogerta Manastirliu. Sipas tij, ky është lajm shumë i mirë, dhe tregon humanizëm të shqiptarëve.
“Reagimi juaj, i mbarë popullit ka qenë fantastik deri tani, megjithëse fillimi i mbarë është gjysma e punës. Në këtë rast jemi shumë larg gjysmës dhe prandaj çdo ditë duhet t’a përjetojmë si një fillim të ri, nga e para, çdo ditë luftë me veten dhe me zakonet e forta të përditshmërisë tonë.
Ne, qeveria e kam fjalën, po punojmë me të gjitha forcat që të llogarisim çdo hap, të përgatisim çdo skenar, të jemi ne gati në çdo situatë dhe të kemi gati edhe rikthimin në jetën normale, sapo lufta të mbarojë.
Ju kërkoj ndjesë të gjithë atyre të kenë vështirësi të paparashikuara për masat e marra. Nuk i parashikojmë të gjitha në çdo detaj, në këtë luftë me shumë të panjohura, ku vendet më të fuqishme të botës janë kapur gafil.
Të gjithë po ndryshojnë qasjet çdo ditë, dhe po bëjnë gjërat që ne i kemi bërë tani. Të martën ‘perimetri’ blinduar do të njësohet me kufirin e Republikës së Shqipërisë. Shqipëria javën tjetër do të jetë siç ishin Tirana dhe Durrësi këtë javë që kaluam”, u shpreh Rama.
