Në mbledhjen e djeshme, Komisioni i Ekspertëve të Ministrisë së Shëndetësisë në Greqi vendosi heqjen e certifikatës së vaksinimit kundër Covid-19.
Nga 1 maji, Greqia do të heqë detyrimin për paraqitjen e certifikatës së vaksinimit kundër Covid-19, si dhe nuk do të kërkojë pasaportën e Covid në pikat kufitare të vendit.
Megjithatë mbajtja e maskës në ambientet e brendshme dhe në ambientet e jashtme me grumbullim, mbetet ende në fuqi.
Komisioni i Ekspertëve të Ministrisë së Shëndetësisë në Greqi rekomandoi:
Pezullimi i certifikatës së Covid nga 1 maji.
– Pezullimi i certifikatës së Covid nga pikat hyrëse në vend.
– 1 test i shpejtë në javë (nga dy deri tani) te punëtorët e pavaksinuar, me përjashtim të spitaleve ku mbeten 2 testet e shpejta në javë për punëtorët e pavaksinuar.
Sqarohet se kjo vlen për ata punonjës që janë përjashtuar nga vaksinimi dhe shoqëruesit e pacientëve.
– 1 test i shpejtë (nga 2 që ishin deri më tani) për mësuesit dhe pedagogët e pavaksinuar.
Qeveria greke do të rishqyrtojë sërish situatën, për të vendosur nëse do t’i lehtësoje ose shtrëngojë masat kundër Covid-19.
