Neymar tek Real Madrid, Zidane thyen heshtjen: E pëlqen gjithë bota

Është diskutuar shumë kohët e fundit një kalim i mundshëm i yllit brazilian Neymar tek Real Madrid dhe tani duket se gjithçka po merr formë. Ndoshta është e vërtetë që kalimi tek PSG ishte vetëm një mënyrë për të shmangur një përplasje Real-Barcelonë. Elozhe janë thurur shumë për brazilianin, nga presidenti Perez tek kapiteni i madrilenëve Sergio Ramos.

Zidane kishte heshtur për këtë temë, por duket se dhe ai është i magjepsur nga ajo që bën Neymar në fushë dhe dëshiron që ta ketë në ekip. Për herë të parë, në një konferencë për shtyp përpara ndeshjes së radhës në kampionat kundër Deportivos, trajneri i Real Madrid ka përmendur emrin e brazilianit, që luan për ngjyrat e PSG. “Nuk e kam zakon të flas për futbollistët që nuk janë pjesë e skuadrës sime. Por Neymar është një futbollist që i pëlqen të gjithë botës së futbollit, sepse është një futbollist i madh”, deklaroi trajneri Zinedine Zidane.

Lidhja mes talentit brazilian dhe klubit madrilen nuk është një zë i ri që vjen në media, por raportet e tensionuara që ai ka me një pjesë të mirë të skuadrës, në veçanti me uruguaianin Cavani, të bashkëngjitura këto edhe me thashethemet e largimit të Ronaldos nga Madridi verën e ardhshme, e rikthejnë në qendër të vëmendjes këtë çështje. Ndërkohë Zidane ka konfirmuar se Real Madrid nuk do të ndërhyjë në merkaton e janarit për të bërë përforcime.