Kryedemokrati Basha ka mbajtur sot një takim me artistët dhe përfaqësuesit e Aleancës për Mbrojtjen e Teatrit. Takimi është zhvilluar në selinë e PD, dhe Basha mësohet se u ka dhënë sërish mbështetjen artistëve.
Pas takimit, Basha u shpreh se Teatri Kombëtar është vija e kuqe dhe nuk do të lejohet që qeveria të shembë godinën. Basha është shprehur më tej se artistët janë përballur me dhunë, dhe se çdo hap për prishjen e Teatrit është një akt i pastër lufte ndaj qytetarëve, artit dhe artistëve.
“Artistët janë përballur me dhunë, represion dhe nuk janë duke mbrojtur një gjë personale. Çdo hap për prishjen e Teatrit, është një akt i pastër lufte ndaj qytetarëve, artit dhe artistëve.
I bëj thirrje të gjithë demokratëve, qytetareve që sot janë në pasiguri për jetën, me tavolinë të boshatisur ta kuptojë se sot te Teatrit Kombëtar është vija e kuqe e përballjes me regjimin.
Nëse ky pushtet do ti shkojë deri në fund marrëzisë, le ta presin zjarrin nga Surreli tek qendrat tregtare, objektet luksoze të krimit të organizuar dhe oligarkëve. Teatri Kombëtar është vija e kuqe”, deklaroi Basha.
