Nënkryetarja e Bashkisë së Tiranës, Anisa Ruset u shpreh se këtë mandat do të punohet për Tiranën e 100 viteve të ardhshme. Këtë deklaratë e ka dhënë teksa po prezantonte investimet që janë parashikuar për t’u realizuar gjatë 2020-s.
Gjatë dëgjesës me banorë të njësive 7 dhe 11 në kryeqytet, Ruseti theksoi se Tirana ka treguar këto vitet e fundit se jo vetëm që di të bëjë realitet premtimet, por edhe të jetë një qytet solidar.
“Në mandatin e parë e kishim fokusin që të tregonim që çdo ditë në Tiranë bëhet një punë konkrete. Ndërsa në 4-vjeçarin e dytë duam të punojmë për Tiranën e 100 viteve të ardhshme, që koinçidon edhe me 100 – vjetorin e shpalljes së Tiranës kryeqytet. Në mandatin që kaloi si qytet treguam që jemi solidarë dhe kjo u vu re kryesisht në përballimin e fatkeqësive, siç ishte së fundmi edhe tërmeti, ku 35 shtëpi të dëmtuara prej tij po rindërtohen dhe do të jenë gati për festat e dhjetorit”, theksoi Ruseti.
Ruseti prezantoi projektet për çerdhe, shkolla dhe transformimin e Piramidës në qendrën më të madhe të inovacionit, ku rreth 5 mijë fëmijë do të mund të trajnohen dhe të marrin edhe një profesion të së ardhmes.
