Nënkryetari i bashkisë Kamëz, Vendim Demaj ka folur lidhur me përplasjen që ndodhi para ambienteve të KZAZ-së. Demaj tha se detyra dhe ajo që ata po bëjnë është thjesht zbatimi i vendimit të presidentit Meta. Më tej, ai shtoi se nëse Lleshaj mundet ta arrestojë presidentin Meta, atëherë ata do të tërhiqen.
Sipas nënkryetarit të Bashkisë Kamëz, ata kishin shkuar sot paradite në ambientet e shkollës “Ibrahim Rugova” për të parë nëse ishin liruar ambientet nga materialet zgjedhore, siç është urdhëruar në zbatim të dekretit të presidentit Meta.
“Policia bashkiake është urdhëruar për të zbatuar dekretin e presidentit por kemi hasur në rezistencën e forcave të policisë. Këtyre të fundit u është kërkuar që t’i vejnë në dispozicion urdhrin që kanë por veç urdhrit verbal nga ministri Lleshaj nuk kanë urdhër tjetër.
Ne hasëm në provokimin e forcave të policisë. Shefit të komisariatit i kërkova që unë dhe shefi i policisë bashkiake të hyjë në ambientet e shkollës të shohim nëse materialet zgjedhore janë apo janë larguar. Aty hasëm nën presionin e policisë që u goditëm me shkop gome dhe gaz lotsjellës.
Reagimi jonë dhe i policisë bashkiake mbështetur nga populli është i vendosur për ta zbatuar deri në fund dekretin e presidentit. Ose Lleshi me lleshët e tij të arrestojë presidentin e Republikës dhe dekreti i tij bëhet nul. Derisa presidenti i Republikës është në krye të detyrës dhe botuar në Fletore Zyrtare është i detytruar të zbatohet. Ose arresto, zoti Lleshi, presidentin dhe ne tërhiqemi nga këtu. Zgjedhjet, ti harrojë LLeshi me banditët dhe kopukët e tij, që të ketë në Kamëz, jo e jo por as në Shqipëri.”
