Nga: Marsela Sinani/ Shfaqja e regjisorit boshnjak, Dino Mustafic, “Nëna dhe fëmija”, është përqafuar jo vetëm nga publiku shqiptar, por edhe më gjerë. “Nëna dhe fëmija” garantoi një tjetër sukses të padikutueshëm në festivalin 33-vjeçar “FIAT-Festival”. Ky festival mjaft serioz që mbahet në Podgoricë, sjell pranë vetes shumë shtete të ndryshme, të cilat marrin pjesë me shfaqje konteporane. Pjesëmarrja jonë, falë artistes Ema Andrea dhe një djali po kaq plot talent si Matia Llupa, i dhanë vulën përfundimtare një tjetër sfide.
Matia Llupa është i biri i Ema Andreas në shfaqjen e regjisorit boshnjak, Dino Mustafic, “Nëna dhe fëmija”, i cili tronditi ndërgjegjen e publikut të Tiranës. Ky djalë i pashëm e me një fizik të adhurueshëm, takon nënën e tij pas 20 vitesh. Nga ritakimi, debati i nxehtë e deri tek inçesti nënë e bir, janë të gjitha situata që kaluan nën lëkurën e aktorit 23-vjeçar.
Pjesëmarrja e djeshme në këtë festival nuk ka kaluar pa marrë një trofe. “Nëna dhe fëmija” ishte garancia që aktorët të vlerësoheshin me një çmim. Regjisori boshnjak Dino Mustafic u vlerësua me çmimin “regjia më e mirë”, dhe Ema Andrea si “aktorja më e mirë” e festivalit.
“Tirana Today” e ka rrëmbyer për pak çaste aktorin, për të përjetuar edhe ne ato ndjesi të bukura.
“Po të marrësh pjesë në një festival ndërkombëtar është fantastike, eksperiencë e parë në festival dhe krijon lidhje dhe njohje të shumta ndërkombëtare, të performosh në skenë ku nuk kupton gjuhën tënde, por vlerësojnë performancën në bazë të fizikut, energjisë, ritmit e vibrimit skenik.
Përfaqëson vendin tënd mes vendeve të tjera europiane, dhe fiton çmime dhe vlerësim maksimal nga publiku. Ndjesia me e bukur që mund të kesh si aktor”, tha ai.
“Nëna dhe fëmija” ngjalli mjaft kureshtje tek publiku shqiptar, u përqafua në masë, e në të njëjtën kohë nuk munguan edhe ato dyshimet e mbi të gjitha pikëpyetjet për skenat e forta erotike. Loja aktoriale e sjellë mjeshtërisht nga ta, u pa me të njëjtën qasje edhe jashtë trojeve.
TIRANA TODAY
