Kryeministri i Maqedonisë së Veriut, Zoran Zaev ka deklaruar se nëse nuk merret një vendim pozitiv për çeljen e negociatave, atëherë ekziston rreziku që të bjerë qeveria.
Në një takim me gazetarët në Bruksel, Zaev tha se shtyrja e vendimit në parlamentin gjerman për hapjen e negociatave rrezikon përforcimin e fuqive nacionaliste dhe humbjen e shumicës në Kuvend.
“Nëse vendosin të mos na japin datë, do të ketë mundësi të bjerë Qeveria. Kjo qeveri stabile me të gjitha këto vendime pozitive, ka gjasa menjëherë ta humbë shumicën në Kuvend. Kjo për shkak se deputetëve u premtuam se sigurisht do të marrin vendim pozitiv nga BE-ja nëse ecim përpara. Ajo do të thotë se qytetarët do të inkurajohen të mbështesin nacionalizimin, radikalizmin dhe ajo nuk është në të mirë as të vendit tonë, e as rajonit. Ato janë opsionet dhe ne frikësohemi nga ai variant”, tha Zoran Zaev.
Eurokomisioneri për zgjerim, Johannes Hahn në një mëngjes pune me ambasadorët e vendeve anëtare të BE-së, ka tentuar të nxisë vendim pozitiv për dhënien e pëlqimit që Maqedonia e Veriut të fillojë negociata për anëtarësim. Deri në këto momente nuk ka detaje nga takimi. Kur na ndajnë rreth dy javë nga takimi i ministrave të jashtëm të vendeve anëtare, akoma nuk dihet qëndrimi i tyre përfundimtar për Maqedoninë e Veriut. Takimi i një dite më parë i kryeministrit Zoran Zaev në Bruksel duket se nuk ka ndryshuar asgjë.
“Më shumë vende anëtare të BE-së refuzojnë fillimin e negociatave me Shqipërinë dhe Maqedoninë e Veriut”, shkruan gazeta austriake “Die Presse”, e cila më tej vazhdon se “të parat, Franca dhe Holanda fuqishëm kundërshtojnë fillimin e negociatave më të dyja vendet”.
Presidenti i Komisionit Evropian Junker pas takimit me kryeministrin Zaev, pranoi se disa vende akoma janë kundërshtare të hapjes së negociatave tani.
“Unë e di se disa shtete anëtare kanë shqetësime. Unë do të bëj gjithçka që është në fuqinë time për t’i bindur ato”, theksoi Junker, president i Komisionit Evropian, shkruan Alsat.
Junker megjithatë kishte theksuar se në bazë të fakteve objektive, Maqedonia e Veriut është e gatshme për hapin e radhës. Me eurokomisionerin, Johannes Hahn ishin takuar edhe përfaqësues të VMRO-DPMNE-së të cilët kishin shprehur shqetësimet për funksionimin e institucioneve në vend dhe ngecjen e reformave, por nga ana tjetër, kishin kërkuar fillim të negociatave për anëtarësim.
