Ish-kryeministri Sali Berisha tha pak ditë më parë se mes stafeve të Edi Ramës dhe Lulzim Bashës janë bërë negociata për të zhvilluar një takim lidhur me mënyrën se si do të zgjidhet Prokurori i Përkohshëm i Përgjithshëm.
“Këtë vend e ka katandisur Edi Rama sepse është peng i dosjes së Xibrakës. Këtë nuk ka mbetur njeri që nuk e di sot dhe kur i kujtohet dosja, ai është i gatshëm të ulet barkas dhe të bëjë çdo lëshim. Në këto kushte e ftonte. Çfarë tha Lulzim Basha? Po, plotësisht dakord. Hajde të ulemi të përcaktojmë procedurën ligjore që do të ndjekim dhe që s’mund të ishte kurrë nën 3/5 dhe pastaj të procedojmë me emrin. Jo i thanë ndërmjetësit Lulzim Bashës. Do fillohet me emrin, se pastaj ju mund ta bllokoni. Basha i tha po në qoftë se i bllokojmë, përcaktojmë po në ligj mekanizmin antibllokim. Çfarë ishte ftesa? Ishte një kurth i ulët, i turpshëm në të cilën zoti Basha dhe asnjë politikan nuk mund të binte. Kthesa ishte vetëm për të thënë që e provuam dhe ky s’deshi, hajde zbresim tek 36 deputetët”, u shpreh Berisha pak ditë më parë gjatë një intervistë në Ora News.
Më tej ai tha se “Janë bërë takime përgatitore. Basha ishte shumë serioz në atë që thoshte. Kurse përfaqësuesi i Edi Ramës thoshte: Se kështu na thonë ambasadorët. Sepse ambasadorët donin këtë formë për të mos shkuar pastaj tek emri se mund ta them edhe emrin”.
Por kryeministri Rama tregoi sot një tjetër variant. Ai tha se e ka telefonuar kreun e PD-së, Lulzim Basha dhe telefoni i tij i ka dalë i fikur, ndërkohë që kur i ka dërguar mesazh, nuk ka marrë përgjigje.
“Nuk di që paska thënë Luli që i kam ofruar një pazar, i kam telefonuar dhe doli Albtelekomi. I kam çuar mesazh a mund të komunikojmë dhe nga ana tjetër ka qenë pasqyra e ekranit të telefonit. Nuk kemi komunikuar dhe nuk ka pasur asnjë përpjekje të ndonjë lloj pazar, pse u shkon mendja gjithmonë te pazari? Ç’e kanë këtë sikur janë rritur mes gjelave të detit dhe çdo përpjekje që tu ofrosh u duket sikur u kërkon ndarjen e gjelave. Diçka kanë këta që sa herë u kërkon në mënyrë normale hajde flasin dhe u kujtohet gjeli, jo nuk vij unë se kanë frikë se kofshët i merr tjetri dhe lafsha u ngelet atyre”, tha Rama sot.
