Kryetari i Partisë Demokratike, Lulzim Basha ka reaguar lidhur me raportin e OSBE/ODIHR për votimet e zgjedhjeve të 30 qershorit, teksa deklaroi që në raport thuhet se në Shqipëri nuk ekzistojnë institucionet.
Në përfundim të takimit me aleatët, Basha mbajti një komunikim për mediat, ku tha se në Shqipëri ka marrë fund shtetit i së drejtës dhe fajtor për këtë situatë bën kryeministrin Rama.
“Negociatat nuk kanë shans të hapen në një Shqipëri ku nuk zhvillohen zgjedhjet e lira dhe të ndershme”, tha kryedemokrati.
Po ashtu, ai u shpreh se ka ardhur koha për ndryshime të thella politike, ndërsa theksoi se opozita e bashkuar është e gatshme të ofrojë një platformë kombëtare për daljen e vendit nga kriza, pasi, sipas tij gjendja është kaq e rëndë, saqë nuk mjafton largimi i Ramës.
“Prioriteti ynë kryesor është që t’i japim fund, duke vendosur legjitimitetin. E vetmja rrugë janë zgjedhjet e lira dhe të ndershme. Duhet të largohet për t’i hapur rrugë zgjidhjes për krizën politike”, tha Basha mes të tjerash.
