Ministri i Brendshëm Sandër Lleshaj nga Dropulli deklaroi se qëndrimi i Holandës kundër hapjes së negociatave me Shqipërinë është politik. Po ashtu Lleshaj shprehu mirënjohje për të gjitha vendet e BE-së që i kanë thënë “po” hapjes së negociatave me Shqipërinë.
“Qeveria shqiptare mban përgjegjësi për kriminalitetin që zhvillohet brenda territorit të Republikës së Shqipërisë. Kriminaliteti që zhvillohet në Holandë është përgjegjësi e qeverisë së Holandës që të adresohet në thelb. Megjithatë në rastet kur autorë shqiptarë kryejnë vepra kriminale në Holandë, ne ndiejmë një përgjegjësi për të bashkëpunuar me autoritetet holandeze, përgjegjësi të cilën e kemi ushtruar me shumë seriozitet.
Mund t’ju them që edhe vlerësimet e palës holandeze, sa i përket bashkëpunimit tonë për të luftuar krimin, edhe në Holandë, janë mjaft pozitive. Qëndrimi i tyre lidhur me negociatat është një qëndrim i pastër politik. Ne kemi një përgjigje pozitive nga 26 vende anëtare të BE, të cilat e mbështesin pa kushte hapjen e negociatave. Në qoftë se është ky diskutim për hapjen e negociatave, diskutimi shtrohet vetëm për një ose dy vende.
Jemi shumë mirënjohës për të gjitha vendet e BE, të cilat i kanë thënë “po” hapjes së negociatave dhe këto janë shumica absolute e vendeve të BE”, tha Lleshaj.
