Kreu i Shtetit Ilir Meta në një deklaratë për shtyp ka dhënë përgjigjen për plotfuqinë që i ka kërkuar ministri i Jashtëm Ditmir Bushati për negociatat me Greqinë, e cila sipas Metës është më e debatueshmja gjatë dekadës së fundit.
Meta ka kujtuar vendimin e Gjykatës Kushtetuese te vitit 2010, dhe tha se kjo është vija e kuqe për të gjithë.
“Duke respektuar qëndrimin e opozitës, njëkohësish respektoj dhe qëndrimin e qeverisë për t’i dhënë një zgjidhje përfundimtare kësaj çështje për negociata të reja. Por dua të theksoj se ka një vendim të gjykatës Kushtetuese që është një vijë e kuqe për të gjithë. Është detyrë e Presidentit për të respektuar këtë vendim të gjykatës Kushtetuese.
Presidenti nuk synon të bëjë dhe atë rol që ia jep Gjykata Kushtetuese, pra që të ulet dhe të drejtojë bisedimet, gjë që do të tregonte mungesë besimi tek pala tjetër. Por presidenti ka për qëllim që t’i përmbahet gjykatës Kushtetuese. Presidenti nuk është ai që do të përcaktojë se kush do të shkojë aty. Të gjitha ata janë njerëz të shtetit dhe janë të besueshëm. Presidenti nuk mund të firmosë një letër të bardhë e cila ka nevojë të saktësohet”, tha Meta.
