Pritet të vijë sot në Tiranë, Presidenti i Këshillit të Europës, Donald Tusk. Duke iu referuar agjendës, ai pritet të takohet me kryeministrin Edi Rama në orën 15:00, ku në fokus do të jetë çështja e hapjes së negociatave. Pas takimit me kryeministrin, Tusk do të mbajë edhe një konferencë për mediat në orën 15:35.
Tusk nuk do të ketë asnjë takim me asnjë përfaqësues politik, përfshirë këtu edhe presidentin Ilir Meta. Shqipëria dhe Maqedonia e Veriut, presin përgjigjen pozitive të Këshillit të Bashkimit Evropian për çeljen e negociatave më 18 tetor, për vazhdimin e procesit të integrimit në BE. Pritet që ai të jetë i pari që do të japë lajmin e mirë për këto dy vende, por mendohet se vizita e tij do të shoqërohet edhe me disa kushte shtesë.
Në lidhje me hapjen e negociatave reagoi ditën e djeshme presidenti Ilir Meta. Në një reagim për media nga Peza, kreu i shtetit deklaroi se politika duhet të bëhet bashkë për interesin kombëtar, dhe t’i kërkojë BE-së t’i thotë “PO” hapjes së negociatave. Po ashtu Meta tha se nëse vendosen kushtet për çeljen e negociatave, BE duhet të jetë e qartë ndaj aktorëve dhe institucioneve përgjegjëse, në mënyrë që sipas tij, të jetë e qartë se kush është pengesa për të ardhmen evropiane të Shqipërisë.
