Në “Top 5 Ligat” kryesore, vetëm Serie A mbetet për tu parë

Në Top 5 Ligat kryesore evropiane duket se ka rënë shkëlqimi dhe interesi, pasi mund të themi se janë përcaktuar fituesit edhe pse ka kaluar vetëm gjysma e kampionatit. Vetëm Serie a është akoma duke u luftuar nga katër ekipe të cilat janë në një diferencë të vogël pikësh me njëra tjetrën. Napoli mbanë aktualisht vendin e parë, por pas tij me vetëm një pikë diferencë është Juventusi i cili në gabimin e parë të napolitanëve mund të përfitojë. Ndërsa në vendin e tretë renditet Interi me 40 pikë, vetëm 5 më pak se kryesuesit dhe Roma në të katërtin me 38 pikë por që ka luajtur një ndeshje më pak.

Premier League mund të deklarohet e mbyllur, pasi Manchester City i Pep Guardiolës është duke kaluar një formë fantastike dhe në 19 ndeshje ka regjistruar vetëm një barazim dhe 18 fitore. Ata mbajnë vendin e parë me 55 pikë dhe diferenca me vendin e dytë që mbahet nga Manchester United është mjaft e madhe me plot 13 pikë. Duke parë kontingjentin dhe formën e lartë që ka City mund të cilësohet i pakapshëm në këtë sezon, duke ditur që i ka mposhtur të gjithë rivalët në përballjet direkte.

Edhe La Liga është në të njëjtin drejtim, pasi Barcelona fitoi në “El Clasico’ dhe diferenca me vendin e dytë tani është plot 9 pikë. Asnjëherë një ekip spanjoll nuk e ka humbur vendin e parë kur ka qenë me një diferencë kaq të madhe pikësh dhe nuk pritet të ndodhë edhe këtë sezon.

Në Francë kampionati mund të cilësohej i mbyllur pa filluar dhe dihej që titulli këtë vit do ti takonte PSG. Treshja e sulmit Neymar-Cavani-Mbappe janë duke zhvilluar një sezon fantastik dhe kanë krijuar një diferencë prej 9 pikësh me vendin e dytë që mbahet nga Monaco. Investimet e çmendura të sheikut parisien duket se po jep frytet e saj dhe synimi i tyre tani është Champions League edhe pse do të kenë përballë një kundërshtarë të vështirë si Real Madrid.

Bundesliga pati startin më interesant pas shumë vitesh, ku u duk se nuk do të ishte Bayern Munich ai që do të dominonte. Ishte Dortmund që tregoi një formë mjaft të lartë në fillim të sezonit, por një rënie e lirë në 8 ndeshje pa fituar bëri që të humbnin shpresat. Ndërsa bavarezët u kthyen të vendosnin diktatin e tyre në kampionat pas shkarkimit të Ancelottit. Ishte Jup Heynckes që gjeti harmoninë e skuadrës dhe riktheu Bayernin në majën e klasifikimit dhe tani ata qëndrojnë plot 11 pikë më shumë se vendi i dytë që mbahet nga Schalke.