Shkrimtari dhe diplomati Pëllumb Kulla thotë se ligji i dosjeve i miratuar pak ditë më parë nga Kuvendi është tepër i vonuar në raport me shtete të tjera, që kanë qenë në të njëjtat kushte para 30 vitesh dhe e kanë bërë me kohë ligjin.
Gjatë këtyre viteve është folur e debatuar shpesh për bashkëpunëtorët e Sigurimit të Shtetit në politikën e lartë dhe zyrat e shtetit. Po kështu kanë dalë lista pseudonimesh, apo akuza të ndryshme. Në luftën politike mes palëve brenda PD-së por edhe partive të tjera të së djathtës, ka pasur mjaft akuza e sharje për “spiunët”.
Në një intervistë për “Euronews Albana”, Kulla u shpreh se dosjet nuk janë hapur qëllimisht prej atyre që kanë qenë në pushtet, pasi u duheshin për të qeverisur.
Sipas Kullës, PD-ja duhet ta kishte me kohë ligjin e dosjeve, ndërsa të majtët edhe pse me vonesë duhen përgëzuar që e miratuan një ligj të tillë.
“Derisa iu deshën dosjet sigurimit, pushtetarëve për të bërë qeverisjen i mbajtën dhe tani dalin në shesh. Xhelatët janë ata që njihen dhe mund të ishin marrë masa, dhe demokratët duhet të pyeten pse nuk e kanë bërë ata ligjin e dosjeve?
Unë kam bindjen e plotë se nuk jemi ndarë ende nga e kaluara, jemi në një situatë që e kemi të vështirë të ndahemi nga mëkatet tona. Kjo është keqpërdorur nga të dyja palët politike. Madje duhen përgëzuar ata që e morën iniciativën këtë radhë, por mund të ishte bërë më herët edhe prej tyre”, tha Kulla.
Kur Parlamenti miratoi ligjin e hapjes së dosjeve për politikanët dhe zyrtarëve të lartë, efekti ishte i menjëhershëm. Në publik kanë nisur të dalin jo thjeshtë emra, por dhe dokumente e faksimile për njerëz shumë të rëndësishëm të kupolës së lartë qeverisëse të Partisë Demokratike. Partia Socialiste dhe Partia Demokratike bashkuan votat, për të votuar ndryshimet në ligjin “Për të drejtën e informimit për dokumentet e ish-sigurimit të shtetit të Republikës Popullore Socialiste të Shqipërisë”, nismë e grupit parlamentar të PS-së, duke i hapur kështu rrugë verifikimit të të gjithë të dyshuarve si ish bashkëpunëtor të Sigurimit të Shtetit. Me 94 vota pro dhe 1 abstenim u shfuqizuan vendimet ekskluzive të komisioneve “Bezhani” e “Mezini”, duke i dhënë të drejtë Autoritetit të Dosjeve të rivlerësojë figurën e zyrtarëve të pajisur me certifikatë pastërtie.
