Në ceremoninë e lamtumirës, ambasadori i Austrisë në Shqipëri, Johann Sattler, duket se dha sinjalet për gjetjen e gjuhës së përbashkët mes palëve politike, për ti dhënë fund ngërçit që ka kapluar vendin prej kohësh.
Ambasadori tha mjaft qartë se është i bindur se do të ketë një zgjidhje të krizës. Duket se inatet politike të akumuluara mes partive politike dhe udhëheqësve të saj, ka bërë që në Shqipëri shumë gjëra të mbesin mbrapa dhe të mos ketë zhvillime pozitive. Por Johann Sattler mbetet shpresëplotë se gjithçka do ndryshojë.
“Ndihem i vlerësuar shumë, dhe kjo për mua ishte si surprizë. Për mua ishte një natë befasuese. Në Shqipëri më thanë se: “nuk mërzitesh kurrë”, dhe në fakt këtë e kam vlerësuar dhe e kam përjetuar gjatë gjithë kohës.
Jam i bindur se do të ketë një zgjidhje të krizës. Jam mjaft i lumtur që këtu ndodhet edhe kreu i qeverisë, kemi mjaft miq këtu që kemi punuar ngushtë gjatë këtyre viteve.
Këtu nuk ka ndasi etnike apo fetare, dhe patjetër ka mundësi për tu bërë të gjithë së bashku. Jap nderimet e mia për mediat dhe të gjithë analistët që kanë komentuar situatën politike. Duhet kujdes edhe me fjalët, pasi ato kanë edhe pasoja. Nuk do të ketë demonstrime, mereni me qetësi dhe shpresoj të qëndroni këtu me mua”, tha Sattler.
