Referuar ngjarjes së rëndë ndodhur dje në Shkodër, gazetari investigativ Artan Hoxha raportonte se autorët ishin vrasës me pagesë, kjo duke parë edhe dinamikën e këtij rasti. Detaje të reja janë hedhur në dritë lidhur me masakrën që pllakosi mesditën e djeshme qytetin e Shkodrës, ndërsa një tregtar u vra nga dora e një personi. Ndonëse në vendin ku ndodhi krimi i rëndë, ka pasur shumë njerëz, autori nuk ka gabuar në asnjë prej plumbave.
Vrasje profesioniste
Duke ndërtuar dinamikën e ngjarjes, thuhet se autori është ulur nga motori shumë shpejt, dhe është afruar deri në rreth 10 metër. Mes të tjerash ‘BalkanWeb’ mëson se ai ka qëlluar në ecje e sipër.
Pasi ka qëlluar objektivin, që thuhet se ishte Fatos Ferracaku, i është afruar dhe e ka qëlluar edhe dy herë në kokë viktimën, për t’u siguruar se ka vdekur. Autori ka qëlluar vetëm me njërën dorë, ndërsa raportohet se ka patur një saktësi të madhe, duke qenë preçiz, pra një vrasje profesioniste. Më pas është larguar duke hipur në motor, që drejtohej nga një tjetër person. Sapo ka hipur në motor, autori ka qenë duke futur pistoletën brenda, por më pas ka qëlluar edhe njëherë në ajër për të dhënë ndoshta edhe një mesazh.
Autorët të maskuar
Autori, gjatë kohës që ka qëlluar, e ka pasur xhamin e skafandrës të hapur, por nën të, sipas burimeve mbante një kapuç, pra ka qenë i maskuar. Ndër të tjera thuhet se motori që u gjet duke u djegur në Zooteknike, ka qenë ngjyre gri, tip TMAX 550 kubik, mjet që ka një shpejtësi të madhe.
Në vendin e ngjarjes mësohet se ka qenë rastësisht edhe një efektiv i policisë, civil, ndërsa ai ka tentuar që ta ndjekë autorin duke vrapuar, por motori është larguar me shpejtësi. Ndërkohë, personi që drejtonte motorin ka patur skafandër në kokë, ndërsa ka qenë i veshur me rroba ngjyrë gri. Policia po punon për zbardhjen e plotë te kësaj ngjarje, ndërsa ende nuk ka rënë në gjurmët e autorëve të mundshëm.
