Pak më herët, maturantët mbyllën protestën e tretë. Ata kanë thënë se do të vijojnë betejën e tyre, deri në plotësimin e të gjitha kërkesave që i kanë dorëzuar tek Ministria e Arsimit.
Në lidhje me këtë situatë kaotike, Ministrja e Arsimit, Besa Shahini, ka bërë një deklaratë për shtyp. Ajo i mëshon fort faktit se protesta ishte politizuar, dhe se madje kishte dalluar në mes të të rinjve, edhe studentë që ishin pjesë e strukturave të partive opozitare.
“Ju drejtohem sot, sepse besoj se jeni shqetësuar nga një debat i çuditshëm. Një stërpolitizim i skajshëm, i cili shpërqëndroi nxënësit nga puna për provimet e radhës, por edhe keqinformoi një debat që mund të ishte i dobishëm kombëtar, për mënyrën si po zhvillohet sistemi i arsimit universitar.
QSHA kanë adresuar të gjitha shqetësimet për mënyrën sesi është zhvilluar matura dhe si do të zhvillohen javën tjetër. Kjo është një çështje teknike që e organizojnë ekspertët e fushës, dhe më pak ne që jemi persona politikë.
Provimet Kombëtare nuk penalizojnë nxënësit. Kjo është e rëndësishme të përmendet. Është i dizajnuar që të masë njohuritë e nxënësve. Testi Piza që është standarti i vlerësimeve e bën këtë.
Të gjitha vendet e tjera kanë shkuar drejt kësaj. Të masin kompetencat që nxënësit duhet të kenë. Pyetjet, dëgjova disa të rinj të thoshin që kishin pyetje logjike, por kështu duhet të jetë.
E mësojmë, për ta përdorur drejt. Provimet kombëtare kanë filluar të masin kompetencat. Një debat që duhet të ndodhë, jo nga politika por ekspertët, për mënyra sesi po u mësohet gjuha shqipe në shkolla.
Duhet të ndodhë nga ata që kanë mësuar letërsinë. Në fund, thashë disa të rinj kur iu referova protestuesve, sepse nuk e di kush po proteston, mesa pashë kishte studentë që ishin pjesë e partive opozitare dhe disa që ishin në universitet. Pashë që kishte dalë edhe një burrë. Jam e bindur që maturantët nuk identifikohen me këta persona. Ju uroj suksese nesër dhe për provimin e të enjtes”.
