Në kohën kur vendi është tronditur nga tritoli, Rama flet “pa doreza”. Akuzat e opozitës e kanë prekur kryeministrin, aq sa në mbledhjen e grupit parlamentar të PS, ai ka qënë i drejtpërdrejtë.
Sulmeve të njëpasnjëshme të opozitës, Rama i është kthyer me fakte. Ai nënvizoi se qeveria po godet eksponentët e shumtë të krimit. Kjo i referohet akuzave të njëpasnjëshme që vijnë nga ana e Bashës e Kryemadhit.
Për të, është banale që të hedhësh baltë dhe shpifje ndaj qeverisë, kur shifrat tregojnë një tjetër realitet. Kryeministri përmendi rastin e Shkodrës dhe Elbasanit, ku sipas tij, është ulur numri i vrasjeve.
“Mbrëmë natën, vajzës së kthyer në mish për topat e kësaj politike, i është hedhur lëndë plasëse në shtëpi. Kush është i interesuar për të thënë se vajza është nën terror psikologjik. Ne? Jo. S’ka mëndje që se kupton që për këtë kanë interes ata që dhunuan përditë dhe askush tjetër”, deklaroi Rama.
Kujtojmë këtu faktin se një sasi e vogël tritoli, ka shpërthyer rreth orës 23:30 të mbrëmjes së kaluar, në oborrin që lidh dy banesat e gjyshit të Xhisiela Malokut dhe vëllait të tij, në Larushk të Fushë-Krujës. Nëntë persona janë shoqëruar nga policia, e po merren në pyetje për ngjarjen.
