Kryeministri Edi Rama ka ashpërsuar tonet në lidhje me protestat që po organizohen në vendin tonë, kundër rritjes së çmimeve. Ai ka përsëritur qëndrimin e tij lidhur me protestën e qytetarëve kundër rritjes së çmimeve, duke e cilësuar atë një turp kombëtar. Rama nënvizoi ndër të tjera se Shqipëria nuk ka patur qeveri më të vëmendshme ndaj protestave në këto 8 vite. Po kështu i është rikthyer edhe trazirave duke thënë se në Shqipëri haje plumbin ballit kur dilje në protestë, por qeveria i ka dëgjuar protestat me respekt.
“Ne duhet të financojmë nga buxheti i shtetit dhe vendimmarrja që ne kemi marrë qysh përpara se të fillonte lufta, dhe përpara se ta dinin se çfarë mund të ndodhte është që pjesën e rritur të çmimit të energjisë ta kemi nga buxheti i shtetit. Sot fatura vjen njësoj përpara se të kishte krizë. Me 7 lekë/ kw.
Llogarinë që mund të bëni sot, merrni faturën e energjisë dhe shikoni se sa del shifra. Asnjë qeveri tjetër nuk po e bën këtë deri tani, siç ne nuk kemi rritur çmimin e energjisë, të gjitha qeveritë e tjera kanë rritur çmimin e energjisë direkt. Është çmenduri që pas tërmetit dhe pandemisë , kriza energjetike t’i faturohet qytetarëve. Ne nuk mundet dot që t’i çojmë edhe këtë faturë. Gjërat që ndodhin, dhëmbin.
Nëse çmimi i energjisë do të kishte ardhur me faturën e krizës, atëherë nuk do kishte njeri në këtë vend, nuk do të donte të dilte në rrugë. Fakti që nuk ka ardhur do të thotë se kemi vendosur mburojë financiare që në momentet e para të krizës. Kjo qeveri është e kundërta e asaj shëmbëlltyre që përpiqen të pikturojnë me propagandën e shfrenuar kundër fakteve ata që ju rrokanisin kokën gjithë këto vite dhe ca të tjerë që dalin atje që e bëj Shqipërinë për turp. Për turp proteston që në ditën e para të luftës për pasojat e luftës për çmime. Shkruante një profesor i nderuar, Fatos Tarifa një letër të hapur për mua dhe më qortonte për arrogancë ndaj protestuese. Unë e përsëris; ajo protestë është një turp kombëtar, faktet janë aty dhe kujtesa e secilit munda ta konfirmojë. Nuk ka pasur Shqipëria qeveri më të vëmendshme ndaj protestave në këto 8 vite. Në këtë vend haje plumbin ballit kur dilje në protestë, por ne i kemi dëgjuar protestat me respekt”, tha Rama.
