Gjakra të nxehtë dhe tensioni në majë gjatë ndeshjes së Championship mes Stoke City e Derby. Shtyrje e rrahje pas kartonit të kuq për futbollistin e Stoke, Etebo, por ajo që ndodh para syve të arbitrit të ndeshjes, England, është e pabesueshme.
Bradley Johnson, mesfushori i Derby me trajner Frank Lampard, goditet pas shpine nga Allen e i kthen veprimin… me një kafshim! Të dy lojtarët ndëshkohen me karton të verdhë për episodin, pastaj lojtari i Derby zëvendësohet në pushim të lojës nga tekniku, ish-mesfushori i Chelsea, i tërbuar me lojtarin e tij.
“Në pushim të ndeshjes më pyetën çfarë ndodhi. Provoi të më kafshonte, por kapi vetëm fanellën”, është komenti i Joe Allen. Vitet kalojnë, por përpara këtyre imazheve nuk mund të mos vijë në kujtesë kafshimi i Suarez ndaj Chiellini në qershor të 2014 gjatë ndeshjes Itali-Uruguay në Botërorin e Brazilit.
Edhe në atë rast pati vetëm karton të verdhë për “El Pistolero”, por më pas u dënua me 9 ndeshje skualifikim për ndeshjet ndërkombëtare, katër muaj larg aktiviteteve futbollistike dhe 82mijë euro gjobë. Stoke ka lajmëruar se nuk ka ndërmend të bëjë apel, sado të dënohet Johnson.
