“Arena Kombëtare” pritet që shumë shpejt të mbarojë punimet me betonizimin dhe më pas të filloj të marrë formën e një stadiumi. Tashmë është kryer një pjesë e mirë e punimeve, për skeletin e impiantit dhe këto lloj punimesh pritet të përfundojnë brenda muajit korrik të gjitha punimet e betonarmesë.
Në një prononcim për “Top Channel”, Anëtari i Komitetit Ekzekutiv të FSHF-së, Arben Dervishaj, i cili është dhe përgjegjës për investimet për infrastrukturën në këtë institucion, tregon se janë krijuar ambientet e dhomave të zhveshjes, si dhe sallës së konferencave. Dervishaj shtoi se stadiumi pritet të jetë gati në mars të vitit 2019, ku pritet të zhvillohen edhe ndeshjet e muajit mars.
“Puna po ecën me ritme të shpejta dhe besoj se brenda muajit, ose maksimumi 15 ditët e para të korrikut do të kenë përfunduar të tëra punimet e betonarmesë. Më pas do të vazhdojnë punimet në drejtime të tjera.
Për dy-tre muaj do të mbyllet edhe pjesa e mbulimit të stadiumit, që për të thënë të vërtetën mbulimi është goxha i madh. Shpresojmë që në fund të vitit ne ta kemi gati stadiumin për kolaudim. Do të duhet koha e nevojshme për provat, por stadiumi do të jetë gati besoj në fund të marsit 2019 për të luajtur”, deklaroi Dervishaj.
