Në emisionin “Thumb On”, këngëtarja Eneda Tarifa ka zbuluar disa detaje nga hapat e parë të karrierës. E pyetur nga Fatma dhe Aulona nëse i vinte për të qeshur me veten, kur shikonte si ishte veshur para 10 apo 15 viteve, ajo tha se kishte bërë më të mirën.
Teksa tregonte sakrificat e saj dhe të familjes, këngëtarja nuk nguroi që të tregonte se sa e vështirë ishte. “Në përgjithësi jam veshur vetë, sepse gjithmonë kam menduar që veshja nuk ka ndonjë rëndësi të madhe.
Por më vonë filluam të punonim me profesionistë të fushës. Në festivalin e ’97-s, kisha veshur një fustan të zi të mbrëmjes së maturës së gocës së hallës sime. Na u duk i bukur të gjithëve familjarisht.
Natën e parë kam qepur një kostum me një copë 15 mijë lekëshe, nga ato që mbante mami. Realisht ka qenë bukur, pavarësisht mundësive. Në Festivalin e Pranverës kisha veshur një gjë që nuk më shkonte. Aty ishte Lori Kaçka, dhe bashkë me të ishte dhe goca e tezes. Më thotë mua, po heq unë veshjen time se të shkojnë më shumë këto. Dhe vesha të asaj. Në momentin e fundit jam sajuar”, tregoi ajo.
