Kryeministri Edi Rama ka postuar një video në të cilën shfaqet presidenti turk Recep Tayyip Erdogan, teksa iu bën thirrje anëtarëve të Konferencës Islamike që të kontribuojnë për t’i ardhur në ndihmë Shqipërinë që të rimëkëmbet pas tërmetit të 26 nëntorit.
Në videon e publikuar në “Facebook”-un e kreut të qeverisë, Erdogan dëgjohet teksa thotë se Turqia do të bëjë aq sa të mundet për të ndihmuar Shqipërinë.
https://www.facebook.com/edirama.al/videos/590056478465692/?t=0
“Konferenca Islamike ka 50 anëtarë. Ne po të kapemi dorë për dore, po të bashkojmë fuqitë, nuk ka rëndësi sasia, shumë apo pak, ne e ngremë Shqipërinë në këmbë. Kuptohet që dëshirat janë të mira. Por dëshirat po të mbeten vetëm fjalë fluturojnë. Mjalti po nuk hyri në gojë, nuk ëmbëlsohet goja. Ky mjaltë duhet ngrënë, ose ta ndajmë edhe me vëllezërit tanë këtë mjaltë.
Ne këtë duhet të bëjmë, të ndajmë mjaltin së bashku. Bota Islamike është ajo që do ta hedhë hapin më të rëndësishëm. Ne si Turqi po punojmë, por e dimë që nuk është e mjaftueshme. Ne do punojmë, do të vazhdojmë. Zoti Kryeministër i ka dërguar letra dhe kërkesa shumë vendeve. Shpresojmë të marrin përgjigje pozitive këto kërkesa, sepse ne e kemi ndjerë dhimbjen e këtij tërmeti vite më parë në Turqi”, tha ndër të tjera Erdogan.
