Një ditë më parë, kryeministri Edi Rama paralajmëroi furnizuesit e naftës në Shqipëri se do të humbasin pikat e tyre furnizuese, nëse do të aplikojnë çmime abuzive. Në takimin me disa prej bizneseve të naftës, Rama bëri me dije se do të krijohet Bordi i Administrimit të Karburanteve, i cili do të përcaktojë çdo ditë çmimet e lëndëve djegëse në vendin tonë, të cilat do të publikohen në mënyrë transparente çdo ditë.
Kreu i qeverisë ka reaguar sërish ditën e sotme. Kur pritet që në orën 11:00 të nisë një tjetër protestë para Kryeministrisë, Rama thekson se duke nisur nga sot Bordi Kombëtar i Administrimit të Karburantit do të kalojë në filtër marzhin e fitimit të çdo kompanie karburanti.
“MIRËMËNGJES
dhe me konfirmimin se nga sot, me ngritjen e Bordit Kombëtar të Administrimit të Karburantit, çmimet do të kalojnë në filtrin e transparencës dhe marzhi i fitimit të kompanive do të ngrijë, për të mos lejuar asnjë abuzim në kurriz të qytetarëve, ju uroj një fundjavë të mbarë”.
Rama kërcënoi hapur se çdo subjekt furnizimi me lëndë djegëse do të falimentojë, nëse aplikon çmime më të larta se kostot që miraton bordi i sipërpërmendur. “Në këto kushte, brenda 24 orësh do kalojmë një akt normativ dhe qeveria do hyjë në administrimin e furnizimit bashkë me ju, përmes një bordi kombëtar të furnizimit me karburant dhe çdo ditë ju dhe qeveria. Nuk do të ketë asnjë çmim të pamiratuar nga bordi, kush do e bëjë do humbasë pikën e karburantit”, u shpreh fillimisht kryeministri një ditë më parë.
