Tashmë është zyrtare. Pas shumë orësh debati dhe paqartësie Conmebol ka vendosur që ndeshja River Plate-Boca Juniors të mos zhvillohet sot në orën 20:00. Ajo u shty edhe ditën e djeshme për shkak të sulmit që u bë ndaj autobusit të ekipit të Boca-s.
Presidenti i Conmebol, Alejandro Dominguez konfirmoi se ndeshja do të zhvillohet edhe pse nuk kanë caktuar ende një datë të re. Ndërkohë Boca ka kërkuar që ndeshjen ta fitojnë në tavolinë për shkak të trazirave të shkaktuara duke bërë fajtore klubin e River Plate që nuk ka marrë masat e duhura për zhvillimin e kësaj finaleje.
Kjo ka qenë kërkesa e Boca-s: “Club Atletico Boca Juniors ka bërë një kërkesë formale drejt Conmebol ditën e diel për të shtyrë ndeshjen e kthimit të finales së Copa Libertadores,” shkruan klubi nëpërmjet një deklarate për shtyp.
“Pas dhunës së treguar rrugës për në stadium dhe pasi kemi shqyrtuar magnitudën dhe seriozitetin e tyre, Boca mendon se kushtet për të luajtur ndeshjen nuk janë përmbushur dhe prandaj kërkon që sfida të pezullohet.”
