Komisioneri i BE-së për Zgjerim, Oliver Varhelyi, deklaroi se përsa kohë ndryshimet në Kodin Zgjedhor nuk ndalojnë koalicionet paszgjedhore, atëherë nuk përbëjnë problem. Në konferencën e përbashkët me Edi Ramën, komisioneri foli për çështjen e koalicioneve. Ai tha se është shumë e rëndësishme, dhe nuk mund të pengohen me anë të një ligji.
“Duke u bazuar tek debati politik përpara dhe gjatë procesit të votimit, duket se ka të bëjë me një çështje që e thashë edhe dje. Për sa kohë që koalicionet pas zgjedhore nuk parandalohen, atëherë ne mund ta shikojmë atë ligj me një mendje të hapur, por nuk mund të kufizojmë të drejtat e të zgjedhurve për të formuar koalicione para dhe pas zgjedhjeve. Shpresojmë shumë që pas marrëveshjes së 5 qershorit, shpresoj që të gjitha partitë politike të marrin pjesë në zgjedhje”, u shpreh ai.
