Ministria e Financave dhe Ekonomisë pritet që së shpejti të depozitojë në Kuvend një nismë ligjore, sipas të cilës të dhënat e llogarive bankare të individëve dhe bizneseve nuk do të jenë më “sekrete”. Drejtoria e Tatimeve, Shërbimi Informativ dhe Drejtoria e Parandalimit të Pastrimit të Parave të Pista, do të kenë akses në një regjistër, i cili do të krijohet me të gjitha llogaritë bankare dhe kasetat e sigurisë të çdo individi dhe biznesi në Shqipëri.
Të dhënat do t’i shërbejnë tatimeve për të identifikuar tatimpaguesit që kryejnë evazion fiskal, shmangin taksat dhe nuk paguajnë detyrimet tatimore, ndërsa organet e tjera do të kenë për qëllim zbulimin personave që kryejnë vepra penale në fushën e pastrimit të parave dhe krimit të organizuar.
Në këtë regjistër do të kërkojë të dhëna edhe autoritetet që punojnë në fushën e hetimit, Prokuroria, policia dhe agjenci të tjera të lidhura me to.
