Policia rrugore ka dërguar një draft me propozime pranë ministrisë së Brendshme mbi Kodin Rrugor.
Të gjithë drejtuesit e automjeteve të cilët bëjnë shkelje të Kodit Rrugor, masat administrative të gjobave nuk do të vendosen më nga komisioni i cili vepron pranë Policisë Rrugore, por nga efektivi i cili konstaton shkeljen.
Burime për “Tv Klan”, thanë se ndryshimet për Kodin Rrugor në nenin 201 propozojnë që masat administrative të shqyrtohen tek organi administrativ shtetëror vetëm nëse do të kërkojë kundravajtësi, në të kundërt masa administrative do të vendoset dhe ekzekutohet nga agjenti i policisë.
Drejtuesi i automjetit, nëse është kundër vendimit të caktuar nga organi administrativ mund të bëjë ankim brenda 5 ditëve, nga dita e shpalljes në gjykatën e rrethit ku është kryer kundërvajtja.
Masa e gjobës sot jepet nga agjentiverifikues me një shumë deri në pesë mijë lekë, mbi këtë shumë drejtuesit e mjeteve drejtoheshin pranë komisionit të policisë rrugore, i cili në mjaft raste ishte kosto e dyfishtë për qytetarët, pasi duhet të prisnin me orë të tëra në radhë për të dalë para këtij komisioni.
