Kreu i PDK-së, Nard Ndoka, i ka bërë thirrje kryeministrit Edi Rama që të reagojë, pasi krimi ka pushtuar Shqipërinë. Ndoka e ka cilësuar ngjarjen e Shkodrës, ku u ekzekutua biznesmeni 31-vjeçar, si rënie të shtetit. Ai i ka kërkuar Ramës që të zgjohet nga gjumi, të qëndrojë në krye të shtetit, të qeverisë, dhe të mos tallet me popullin.
Duke u ndalur tek statistikat, Ndoka i kujton Ramës disa shifra të frikshme. “Katër vrasje me pesë viktima në Shkodër, dy persona të zhdukur, tre automjete të djegura; ende asnjë autor i dyshuar, asnjë pistë hetimi, asnjë motiv, asnjë përpjekje institucionale, asnjë shpresë për familjet shkodrane”, shkruan ai përmes një statusi në Facebook.
Mesditën e së shtunës, Arjan Ferracaku është gjetur i vrarë në periferi të qytetit të Shkodrës. Ai u gjet i pajetë pranë një makine të djegur. Por të dhënat e para janë kontradiktore, sepse policia e pyetur për rastin thotë se makina e djegur, nuk ka lidhje me ngjarjen.
