Babai i Ibrahim Licit, pas kërkesës për vetëdeklarimin e pasurisë nga OFL, njoftonte me anë të një dokumenti se djali i tij nuk ka pse ti përgjigjet kërkesës së Policisë së Shtetit. Sipas tij, i biri nuk është subjekt i këtij ligji. Në dokument sqarohet fakti se Lici nuk është i dënuar nga asnjë gjykatë vendase apo e huaj, dhe nuk është person nën hetim.
Ky rast shënon edhe refuzimin e parë të një kërkesë të OFL. Sipas Mustafa Licit, djali i tij, Ibrahim Lici nuk është subjekt i OFL-së, me argumentin se ai nuk është person në hetim.
Pavarësisht mungesës së përgjigjes së Ibrahim Licit për të justifikuar pasurinë, OFL-ja pritet t’ia referojë rastin drejtorit të Përgjithshëm të Policisë së Shtetit, i cili sipas ligjit i kërkon prokurorit marrjen e masës së sekuestros.
Në mungesë të deklaratës së pasurisë së Licit, policia i referon prokurorit kërkesën që i ka çuar Licit për deklarimin dhe justifikimin e pasurisë, bashkë me provat e tjera të mbledhur për pasuritë e dyshuara si të paligjshme.
Nëse një subjekt i dyshuar refuzon të deklarojë pasurinë, kjo lëvizje nuk e pengon OFL-në që të vijojë procedurat e parashikuara në aktin normativ të qeverisë, për sekuestrimin dhe konfiskimin e pasurisë së dyshimtë.
Personat që janë subjekte të aktit normativ, kanë afat 48 orë për deklarimin dhe sqarimin e burimit të pasurive, nga momenti që OFL u dërgon njoftimin. Me kalimin e këtij afati, kur subjekti nuk përgjigjet, OFL-ja vijon procedurat për bllokimin e pasurisë.
